اكتسيانى «استانا جاستارى» جاستار رەسۋرستىق ورتالىعى ۇيىمداستىردى. ونىڭ ماقساتى – جالعىز تۇراتىن قارتتارعا تۇراقتى كومەك كورسەتۋ. ۆولونتەرلەر قاريالاردىڭ ۇيىنە بارىپ, ءۇي شارۋاسىنا كومەكتەسەدى, اۋلالارى مەن پودەزدەرىن تازالايدى, كەيدە اڭگىمەلەسىپ, كوڭىل سۇراسادى.
اكتسيا اياسىندا «استانا جاستارى» ۆولونتەرلەرى جالعىز تۇراتىن زەينەتكەر رايدا ميفتاحوۆانىڭ ۇيىنە باردى. وعان تۇراقتى تۇردە كومەك كورسەتىلەدى: ۆولونتەرلەر اۋلاسىن قاردان تازالاپ, ءۇيىنىڭ شارۋاسىنا كومەكتەسەدى. شاي ۇستىندە اجەي وتكەن ءومىرىن, تاجىريبەسىن اڭگىمەلەپ, ەستەلىكتەرىمەن ءبولىستى. ۆولونتەرلەردىڭ كوڭىلى مەن قامقورلىعى قولداۋدىڭ ماڭىزدى بولىگى بولىپ سانالادى.
«قامقورلىق مەكەنجايى» جوباسى ىسكە قوسىلعان ۋاقىتتان بەرى كوپتەگەن مۇقتاج ازامات قامتىلدى. «استانا جاستارى» ۆولونتەرلەرىنىڭ ەڭبەگىمەن 70 جەكە اۋلادا جالعىز تۇراتىن زەينەتكەرلەرگە كومەك كورسەتىلدى. سونداي-اق كاسىپورىندار مەن ۆولونتەرلىك ۇيىمدارمەن بىرلەسە وتىرىپ, 40 قار تازالاۋ اكتسياسى وتكىزىلدى. جاپپاي شارالاردى ۇيىمداستىرۋعا 3 000-نان استام ۆولونتەر مەن ءارتۇرلى ۇيىمنىڭ قىزمەتكەرلەرى تارتىلدى.
«قامقورلىق مەكەنجايى» جوباسى ادامدارعا – ارداگەرلەرگە, قارتتارعا, الەۋمەتتىك قولداۋدى قاجەت ەتەتىن ازاماتتارعا تىكەلەي كومەك كورسەتۋگە باعىتتالعان. سونىمەن قاتار, اكتسيا «تازا قازاقستان» باستاماسىمەن ۇيلەسىمدى جۇزەگە اسادى: ول الەۋمەتتىك قولداۋعا, اۋماقتى ەكولوگيالىق جانە سانيتارلىق تۇرعىدان جاقسارتۋعا, اۋلالار مەن قوعامدىق كەڭىستىكتەردى اباتتاندىرۋعا باعىتتالعان. وسىلايشا, ءومىر ساپاسى ءدال قارتتار مەن الەۋمەتتىك تۇرعىدان وسال ازاماتتار تۇراتىن اۋدانداردا جاقسارادى.
